អាជ្ញាធរខេត្តព្រះសីហនុថាក្រុមការងារសង្គ្រោះបន្ទាន់ត្រូវការពេលវេលាបន្ថែមទៀត ដើម្បីរុះរើអគារបាក់បែកដើម្បីរកជនរងគ្រោះ ដោយថាស្ថានភាពរញ៉េរញ៉ៃនៃអគារ និងបារម្ភពីពលរដ្ឋដែលអគារបាក់លើ។
អ្នកនាំពាក្យសាលាខេត្តព្រះសីហនុលោក ឃាង ភារម្យ មានប្រសាសន៍ថា រហូតមកដល់ពេលនេះក្រុមការងារសង្គ្រោះដែលមានមនុស្សជាង១ពាន់នាក់ កំពុងជួយរុះរើអគារបាក់កាលពីចុងសប្ដាហ៍មុន។ លោកបន្ថែមថា មូលហេតុដែលនាំឲ្យក្រុមការងារត្រូវចំណាយពេលយូរក្នុងការរុះរើនេះដោយសារស្ថានភាពរបស់អគារដែលបាក់នោះមានភាពស្មុគស្មាញ ដែលត្រូវឲ្យក្រុមការងារត្រូវប្រុងប្រយ័ត្នចំពោះការប្រើអេស្ដាទ័រ និងគ្រឿងចាក់ធំៗក្នុងការរុះរើ។
លោកថា៖ «ព្រោះយើងត្រូវកាត់ត្រូវកាយម្ដងមួយដំណាក់កាលៗ ដើម្បីសង្គ្រោះព្រោះយើងអត់អាចទៅចូកឬឈូសបានទេ! ព្រោះមនុស្សជាប់ក្នុងហ្នឹង។ អញ្ចឹងបានន័យថា កន្លែងណាត្រូវកាត់យើងកាត់ម្ដងបន្តិចៗ ព្រោះបើសិនយើងកាយវាអាចប៉ះពាល់ដល់អាយុជីវិតរបស់ជនរងគ្រោះនៅក្នុងនោះ។ មានន័យថា ការរុះរើនេះ មិនអាចធ្វើសំរុកបាននោះទេ គឺធ្វើតាមបច្ចេកទេសរបស់គេ » ។
បើតាមលោក ភិរម្យ ក្រៅពីក្រុមការងារសង្គ្រោះរបស់កម្ពុជាមានតែក្រុមហ៊ុនចិនប៉ុណ្ណោះដែលបានបញ្ជូនក្រុមការងារសង្គ្រោះរបស់ខ្លួនមក ដែលលោកបញ្ជាក់ថា បច្ចេកទេសសង្គ្រោះនេះ គឺអាចទុកចិត្តបាន។
គិតមកដល់ថ្ងៃនេះគឺមានរយៈពេល៣ថ្ងៃ និង២យប់ហើយក្នុងប្រតិបត្តិការជួយសង្គ្រោះនេះ។
ប្រធានសហភាពការងារកម្ពុជា លោក អាត់ ធន់ លើកឡើងថា រដ្ឋាភិបាលពិតជាបានយកចិត្តទុកដាក់ធ្វើបានច្រើនក្នុងការជួយសង្គ្រោះ តែលោកថាដោយសារតែរឿងនេះជាលើកទីមួយ ដែលទើបកើតមាន រដ្ឋាភិបាលគួរសុំជំនួយបច្ចេកទេសពីប្រទេសដែលមានជំនាញជួយសង្គ្រោះក្នុងគ្រោះថ្នាក់របៀបដើម្បីកុំឲ្យអូសបន្លាយយូរដូចនេះ។
លោកថា៖ «ការលើកឡើងរបស់អាជ្ញាធរថា មិនអាចរើឲ្យបានលឿនដូចនេះវាជាហេតុផលមួយ តែបើសិនជាទុករយៈពេលយូរឧទាហរណ៍អ្នកណាមួយគាត់មិនស្លាប់ តែបែរជាប្រើពេល៤ ទៅ៥ថ្ងៃរឿងហ្នឹង អាចធ្វើឲ្យគាត់ស្លាប់បាន។ […] ប្រសិនជាយើងសុំជំនួយគេតាំងពីថ្ងៃទី១មក គេមានបច្ចេកទេស គេធ្លាប់មានពិសោធន៍ គឺអាចនឹងដឹងអំពីការសង្គ្រោះបន្ទាន់ហ្នឹងទាន់ពេលគេអាចជួយសង្គ្រោះមនុស្សបានច្រើនដែរ។ តែមិនដឹងថាមិច តើរដ្ឋាភិបាលយើងធ្វើខ្លួនឯង ឬក៏មានអ្នកជំនាញខាងណាគេជួយ »។
ការបាក់អគារ៧ជាន់ ដែលកំពុងសាងសង់មួយខ្នង នៅក្នុងខេត្តព្រះសីហនុ បានបាក់រាបដល់ដី កាលពីព្រឹកថ្ងៃសៅរ៍ចុងសប្ដាហ៍មុន នឹងបានធ្វើឲ្យមនុស្សស្លាប់ និងរបួសជាច្រើននាក់។ គិតមកត្រឹមម៉ោង៣រសៀលនេះ មានមនុស្សស្លាប់២៦នាក់ និងមនុស្សរបួស២៤នាក់ហើយ ខណៈអាជ្ញាធរបានឃាត់ខ្លួនជនជាតិចិន៤នាក់បញ្ជូនទៅតុលាការ។
លោកនាយករដ្ឋមន្ត្រី ហ៊ុន សែន នៅថ្ងៃនេះ ក៏បានសម្រេចចិត្តដកអភិបាលខេត្តព្រះសីហនុលោក យន្ត មីន និងអនុប្រធានទី១នៃគណៈកម្មការជាតិគ្រប់គ្រងគ្រោះមហន្តរាយលោក ញឹម វណ្ណដា ចេញពីតំណែងផងដែរ ក្រោយពីមានហេតុការណ៍បាក់អគារនេះ៕