សាលាដំបូងខេត្តព្រះសីហនុ សម្រេចឃុំខ្លួនជនជាតិចិនចំនួន៤នាក់ ពាក់ព័ន្ធករណីបាក់អគារកម្ពស់៧ជាន់ ដែលបណ្ដាលឱ្យកម្មករជាច្រើននាក់ស្លាប់ និងរងរបួស។
ក្នុងដីកាបង្គាប់ចុះថ្ងៃទី២៤ ខែមិថុនា ឆ្នាំ២០១៩ ចៅក្រមសាលាដំបូងខេត្តព្រះសីហនុលោក សុក ហេង បានសម្រេចឃុំខ្លួនជនជាតិចិនចំនួន៤នាក់ ក្នុងមាននោះ ម្ចាស់ការដ្ឋានសំណង់ម្នាក់ ជាងសំណង់ និងអ្នកមើលការងារក្នុងការដ្ឋាន។
ជនជាតិចិនទាំង៤នាក់នេះ ត្រូវចៅក្រមស៊ើបសួរចោទប្រកាន់ផ្សេងគ្នា ដោយម្ចាស់ការដ្ឋានសំណង់ម្នាក់ឈ្មោះ Cheng Kun និង ម្ចាស់ក្រុមហ៊ុនម៉ៅការសំណង់ឈ្មោះ Deng Xin Gul ត្រូវបានចោទប្រកាន់ពីបទមនុស្សឃាតដោយអចេតនា បង្កឲ្យមានរបួសដោយអចេតនា និងធ្វើឲ្យខូចខាតដោយចេតនាមានស្ថានទម្ងន់ទោស ដោយសារបង្ករបួសស្នាមដល់អ្នកដទៃ។
ចំណែកជាងសំណង់ឈ្មោះ Gao Yu និងអ្នកមើលការងារក្នុងការដ្ឋានឈ្មោះ Xie Ya Ping ត្រូវបានចោទប្រកាន់ពីបទសមគំនិតក្នុងអំពើមនុស្សឃាតដោយអចេតនា, សមគំនិត ក្នុងអំពើបង្កឱ្យមានរបួសដោយអចេតនា និងសមគំនិតក្នុងអំពើធ្វើឱ្យខូចដោយចេតនា មានស្ថានទម្ងន់ទោស ដោយសារបង្ករបួសស្នាមដល់អ្នកដទៃ តាមមាត្រ២៩ ,២០៧, ២៣៦ និងមាត្រា៤១៤នៃក្រមព្រហ្មទណ្ឌ។
អ្នកពាក្យនាំសាលាដំបូងខេត្តព្រះសីហនុលោក លឹម ប៊ុនហេង ប្រាប់វីអូឌីបន្ថែមថា សមត្ថកិច្ចកំពុងស្រាវជ្រាវរកអ្នកពាក់ព័ន្ធផ្សេងទៀតផងដែរ។
លោកថា៖ «ចៅក្រមបានសម្រេចឃុំខ្លួនជនជាតិ៤នាក់ហើយ! ឥឡូវ កំពុងស្រាវជ្រាវស្វែងរកអ្នកពាក់ព័ន្ធ»។
ការបាក់អគារកម្ពស់៧ជាន់ នៅខេត្តព្រះសីហនុ កាលពីថ្ងៃទី២២ ខែមិថុនា ឆ្នាំ២០១៩ បានបណ្ដាលឱ្យកម្មករស្លាប់ចំនួន២៨នាក់ និងរងរបួសចំនួន២៦នាក់។ តាមសេចក្តីប្រកាសព័ត៌មានរបស់រដ្ឋបាលខេត្តព្រះសីហនុ ប្រតិបត្តិការរុករកជនរងគ្រោះក្នុងអគាររលំ ត្រូវបានបិទបញ្ចប់នៅត្រឹមម៉ោង៧កន្លះយប់ ថ្ងៃទី២៤ ខែមិថុនា ម្សិលមិញ៕